|
23.07.2010 16:16
 Լենա Բադեյան
«Ռադիոլուր»
ՀՀ նախագահ Սերժ Սարգսյանն այսօր Ծաղկաձորում էր` պարգեւատրելու «Լավագույն մարզական ընտանիք» մրցույթի հաղթողներին: Մրցույթը 7 տարվա պատմություն ունի: Այս տարին աչքի է ընկել մասնակիցների մեծ թվով: Նախագահը ցանկություն է հայտնել, որ տարեցտարի մարզական ընտանիքների թիվը Հայաստանում շատանա, քանի որ համոզված է. «Առողջ միջավայրում միշտ ծնվում է առողջ միտք, իսկ մենք առողջ մտքի մեծ կարիք ունենք»:
Եթե նախորս տարի «Լավագույն մարզական ընտանիք» մրցույթին մասնակցել է 171 ընտանիք, ապա այս տարի մասնակից- ընտանիքների քանակը հասել է 347- ի: Եզրափակիչ փուլին, սակայն, հասավ ընդամենը 72 ընտանիք` ՀՀ մարզերից, Երեւանից եւ ԼՂՀ- ից 6- ական ընտանիք£
Բավական մասնագիտորեն մարզական քայլերթին` ծնողների հետ միասին քայլում էին նաեւ ամենակրտսեր մասնակիցները: Ի դեպ` մրցույթն այս տարի անցկացվել է 2 տարիքային խմբով: Առաջին տարիքային խմբում ընտանիքի երեխաները 6- 9 տարեկան են, երկրորդ խմբում 10- ից 13: Յուրաքանչյուր տարիքային խմբի ամենակրտսեր մասնակիցը խրախուսական նվեր ստացավ 100 հազար դրամի չափով:
Ինչ վերաբերում է գլխավոր մրցանակակիրներին, ապա նրանք որոշվեցին տեղում: Ի դեպ, ընտանիքներն այստեղ էլ էին իրենց յուրովի դրսեւորում` մրցույթից առաջ ոմանք հոգեբանորեն պատրաստվում էին խաչակնքվելով, ոմանք էլ մեկը մյուսին ոգեւորելով:
Սանթրոսյանների ընտանիքը Երեւանից է եւ մասնակցում էր երկրորդ տարիքային խմբում: Առաջին տեղը զբաղեցբելու համար վկայագիր եւ 500 հազար դրամ ստանալը քիչ չէ, բայց մրցույթը ընտանիքին տվեց ավելի շատ բան, ասում է ընտանիքի հայրը՝ Մելիք Սանթրոսյանը:
«Ամուր ընտանիք էինք մինչեւ սա էլ, եւ սա ավելի մեզ ամրացրեց եւ հնարավորություն ունեցանք երեխայի հետ գնալ մարզվելու, որովհետեւ իրոք ժամանակ չի լինում հաճախակի երեխայով զբաղվել կամ գնալ մարզադաշտ պարապելու»:
Առաջին տարիքային խմբում հաղթող ընտանիքը Շիրակի մարզից էր: Հաջողությունը նրանց ժպտաց երկրորդ փորձից, ասում է Հարություն Ալեքսանյանը:
«Ճիշտն ասած՝ մենք արդեն երկրորդ տարին է, որ մասնակցում ենք այս միջոցառմանը: Առաջին տարին, իհարկե, որպես սկնակ անհաջողություններ եղան, բայց այս տարի արդեն մենք լուրջ նախապատրաստված էինք եւ շատ ուրախ ենք, որ ճանաչվեցինք որպես հաղթողներ: Դժվար էր, որովհետեւ երկար եւ տանջալի աշխատանք էր պետք, որպեսզի հասնեինք այս նպատակին: Փետրվար ամսից սկսած մենք շաբաթական երեք անգամ պարտադիր կանոնավոր մարզումներ էին անցկացնում»£
Կանոնավոր մարզումներն ընտանիքների համար պարտադիր էին դարձել, քանի որ մրցում էին 6 մարզաձեւերում` փոխանցավազք, բասկետբոլի գնդակի նետում զամբյուղի մեջ, պարանի ձգում, թենիսի գնդակի նետում, տեղից հեռացատկ եւ խաղային փոխանցավազք:
Այս ապրելակերպն ընտանիքների համար արդեն ավանդույթ է, սպորտը` պահանջ եւ մարզումները շարունակվելու են մրցույթից հետո էլ, խոստովանում էին մրցույթի մասնակիցները` դրանով իսկ ոգեւորելով նաեւ երկրի նախագահին:
«Ցանկանում եմ, որ միշտ լինեք այսքան առողջ, առույգ, ճարպիկ եւ ուժեղ: Այսպիսի միջավայրում մեծացած երեխաները ճիշտ մանկություն են ունենում եւ որպես կանոն այսպիսի ընտանիքներում մեծացած երեխաները դառնում են հասարակության արժանի անդամներ: Եթե մենք ասում ենք, որ մեր գլխավոր հարստությունը մարդն է, առաջին հերթին մենք պետք է աշխատենք, որ այդ մարդը լինի առողջ: Առողջ մարդը միշտ էլ ունակ է հաղթանակների, առողջ մարդը միշտ ունակ է պայքարի, առողջ մարդը միշտ ունակ է հասնելու հաջողությունների»£
Ոչ մի մասնակից մրցույթից ձեռնունայն չվերադարձավ: Մարզահագուստներից մինչեւ տարբեր մարզաձեւերում հաղթանակի համար նախատեսված 100 հազարական դրամներ: Երկրորդ եւ երրորդ տեղեր զբաղեցնողները նաեւ ստացան համապատասխանաբար 400 եւ 300 հազարական դրամ: Մրցույթի պարգեւատրման ֆոնդը 15 միլիոն 200 հազար դրամ է, իսկ դրամական պարգեւներն ընտանիքները պատրաստվում են ծախսել տարբեր կերպ` մեկը կլուծի ընտանեկան խնդիրները, մյուսն էլ կօգտագործի ամառային հանգիստը պատշաճ կազմակերպելու համար:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
