|
30.07.2010 13:47
 Աննա Նազարյան
«Ռադիոլուր»
Ի՞նչ անել, որպեսզի Հայաստան- Սփյուռք համագործակցությունն արդյունավետ լինի եւ նպաստի ռազմավարական երեք խնդրի` հայապահպանության, հայկական ներուժի համախբվածության ու հայրենադարձության իրագործմանը: Հարցերն այսօր քննարկվել են Սփյուռքի նախարարության կազմակերպած` «Պետություն-Սփյուռք գործակցության զարգացման հեռանկարները» թեմայով կլոր սեղանի ընթացքում:
Ղարաբաղյան խնդրում, Ցեղասպանության ճանաչման, եկեղեցու եւ հավատքի հարցերում Հայաստանն ու սփյուռքը միասնական են, սակայն Սփյուռքի նախարար Հրանուշ Հակոբյանը փորձում է սփյուռքահայ կառույցների միջոցով հստակեցնել, թե ինչպես համագործակցել, որ աշխարհի 100 երկրում հաստատված մոտ 7 մլն սփյուռքահայերին հասանելի լինի անելիքը:
«Արդյո՞ք պետք է համասփյուռքյան մարմին ունենալ,թե՞ համացանցի միջոցով համակարգել»,- ասել է Սփյուռքի նախարարը:
Առանց սփյուռքի հետ համագործակցելու հնարավոր չէ ծրագրեր կազմակերպել, գործակցության հիմքը երկխոսությունն ու համագործակցությունն է, վստահեցրեց Հրանուշ Հակոբյանը, ում համար խնդիր է պարզել, թե ինչպես է ճիշտ համագործակցել սփյուռքի հետ: Նկատի ունենալով մեծաթիվ սփյուռք ունեցող Հունաստանի, Լեհաստանի, Իսրաելի, Ռուսաստանի օրինակը՝ մտածում են ճիշտ է արդյոք համասփյուռքյան համակարգող մարմիններ ունենալ եւ դրա միջոցով համակարգել աշխատանքը:
Սովորելու շատ բան կա հրեական սփյուռքից, մեզ հետ զրույցում պարզաբանեց ԱԺ Բարգավաճ Հայաստան խորհրդարանական խմբակցության քարտուղար Արամ Սաֆարյանը:
«Հազար տարի աղոթեցին ու ստացան պետություն: Հունաստանի համար էլ ուսանելի է Հայաստանի օրինակը, թե ինչպես են հայերը պահպանում իրենց ինքությունը: Խնդիր կան Խորհրդային Միության լուծումից ձեւավորված սփյուռքի հետ»,- ասել է նա:
Իսկ ինչպե՞ս աշխատել, որ դժգոհությունները հնարավորինս քիչ լինեն:
ԱԺ Բարգավաճ Հայաստան խորհրդարանական խմբակցության քարտուղարը պարզաբանեց, թե դրանից խուսափել հնարավոր չէ: Բոլոր երկրներում էլ փոխադարձ դժգոհություն կա, սակայն ամեն ինչից բարձ պետք է լինի համահայկականության զգացումը, կարծիք հայտնեց պատգամավորը:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
