|
28.07.2010 14:16
 Լենա Բադեյան
«Ռադիոլուր»
Կոսովոյի նախադեպից ոգեւորվել պետք չէ, կարծում է Հանրապետական կուսակցության փոխնախագահ, խմբակցության ղեկավար Գալուստ Սահակյանը` հիմնավորելով իր կարծիքն այսպես.
«Արդեն ամերիկյան կողմն ասաց, որ գոյություն ունի երկակի չափորոշիչներ: Դա միայն կարող է Կոսովոյին վերաբերել: Չի կարող Օսեթիային վերաբերել, չի կարող Ղարաբաղին վերաբերել: Սա է վիճակը: Այսինքն` ժողովրդավարական արժեքները երբեմն տնտեսական փոխհարաբերությունների պայմաններում ավելի երկրորդական են դառնում: Սա է ասում այսօր աշխարհը: Այսինքն` այդ առումով աշխարհն այսօր նոր մոդելի փնտրտուքի մեջ է: Եթե ազգերի ինքնորոշման իրավունքը առաջնային չլիներ, այսօր աշխարհում կլիներ մոտավորապես քսան պետություն, ոչ ավելի: Նորից միջազգային հանրությունը հասկացավ, որ կարեւորագույն խնդիրը ազգերի ինքնորոշման իրավունքն է»:
Հաագայի դատարանի որոշումն առաջին հերթին քաղաքական որոշման հետեւանք է, կարծում է պատգամավորը` մատնանշելով այլ ուղղություններ, որի դեպքում Հայաստանը կարող է օգտագործել Կոսովոյի նախադեպը: Այս դեպքում պատգամավորը կիսում է «Եվրոպական ինտեգրացիա» ՀԿ նախագահ Կարեն Բեքարյանի երեկ արտահայտած կարծիքները:
«Ընդհանրապես հայկական դիվանագիտությունը այդ ուղղությամբ պետք է գնա, որ կարողանանք մեզ բարեկամ երկրների հետ աշխատանք տանել, որպեսզի սկսեն ԼՂ ճանաչման գործընթացներ: Այնպես որ կիսում եմ Բեքարյանի ասածը, բայց չեմ ուզում Ղարաբաղի արտգործնախարարությունը առանձնացնել Հայաստանի արտգործնախարարությունից, որովհետեւ դա մեզ համար համազգային խնդիր է: Այդքան չի կարելի անհատականացնել: Իհարկե, որպես դիվանագիտական խաղ կարելի է գցել գործունեությունը Ղարաբաղի վրա, բայց երբեմն էլ ասում ենք, որ Ղարաբաղը ինչպես կորոշի, մենք համաձայն ենք: Դա ասում ենք, բայց դա այդպես չէ: Ոնց որ հայերը կորոշեն, այդպիսի լուծում էլ կստանա Ղարաբաղը»,- ասել է Գալուստ Սահակյանը:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
