|
30.06.2010 19:07
 Լուսինե Ավանեսյան
«Ռադիոլուր»- Ստեփանակերտ
Վարչապետ Արա Հարությունյանի կառավարության՝ խորհրդարանին ներկայացրած ծրագիրը ձեւավորվել է գործող ծրագրի հիման վրա՝ բնական է հիմքում ունենալով նախագահ Բակո Սահակյանի նախընտրական ծրագիրը£
Պատգամավորներին վարչապետը տեղեկացրեց, որ ծրագիրը ներառում է նաեւ նախագահական ընտրություններից հետո հանրապետության ղեկավարի ուղերձներում, հրամանագրերով եւ հանձնարարականներով կատարված փոփոխություններն ու առաջարկները, իհարկե, նաեւ վերջին խորհրդարանական ընտրությունների ընթացքում հնչած որոշ տեսակետները£
Ծրագիրն առաջիկա երկու տարվա համար է, քանի որ այսօրվա կառավարությունը գործելու է մինչեւ 2012 թ նախագահական ընտրությունները, գործունեության նպատակներն են նշվում, դրանց հասնելու ճանապարհներն ու միջոցները£ Կոնկրետ թվերը կնշվեն տարեկաան ծրագրերում, պատգամավորների բացատրեց վարչապետը£
«Վերջինս կներկայացվի յուրաքանչյուր տարի ընդունվող եռամյա պետական միջնաժամկետ ծախսերի ծրագերում եւ ամենամյա սոցիալ- տնտեսական զարգացման եւ հարկաբյուջետային քաղաքականության հիմնական ուղղությունների մասին ԼՂՀ կառավարության զեկույցներում եւ պետական բյուջեի նախագծերում»£
Տնտեսության գերակա ճյուղերը մնալու են լեռնահանքարդյունաբերությունը, գյուղատնտեսությունն ու էներգետիկան£ Ծրագիրը սահմանում է ԼՂՀ կառավարության աշխատանքի հինգ գերակայությունները£ Առաջինը եղել ու մնում է ՂՀ միջազգային ճանաչումը, անվտանգությունը եւ տնտեսական կայուն զարգացման ապահովումը£
«Կառավարությունը շարունակելու է ջանքեր գործադրել մեր հանրապետության միջազգային ճանաչման բացառիկ առաջնային խնդիրի լուծման, անվտանգության ապահովման, անձի կյանքի եւ առողջության, իրավունքների, ազատությունների եւ օրինական շահերի պաշտպանության, ինչպես նաեւ որպես ներդումների, գործարարության համար բարենպաստ եւ անվտանգ միջավայրի, միջազգային վարկի ձեւավորման ուղղությամբ»£
Պատգամավորների բազմաթիվ հարցերը հենց գերակայություններին էին վերաբերում. տնտեսական դաշտ, սոցիալական քաղաքականություն, տեղական եւ տարածքային կառավարում, կրթության եւ գիտություն£ Որքանով վարչապետ Արա Հարությունյանը կարողացավ բավարարել խորհրդարանակններին՝ պարզ կլինի վաղը£ Կառավարության ղեկավարն այսօր վստահության հարց է բարձրացրել£
Ըստ արցախյան օրենսդրության, եթե մինչեւ վաղը պատգամավորների 1/3- ը համապատասխան ձեւաթղթի միջոցով «Ոչ» չասի կառավարության ծրագրին, ապա հուլիսի 1- ին, ժամը 13- 25 րոպեին, ԱԺ նախագահն ստորագրելու է ԼՂՀ կառավարության գործունեության ծրագիրը, որով եւ գործադիրը ժողովրդի ընտրյալների վստահության քվեն է ստանալու£
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
