|
30.07.2010 12:58
 Լիանա Եղիազարյան
«Ռադիոլուր»
Բյուջեի կատարողականի` այս տարվա առաջին կիսամյակի ցուցանիշները հուսադրող են, իսկ բյուջետային կատարողականի հաջորդ կիսամյակի սպասելիքները` դրական: Այս մասին այսօր լրագրողների հետ հանդիպմանն ասել է ՀՀ գլխավոր գանձապետ Ատոմ Ջանջուղազյանը: Նա նկատել է, որ 2009- ի առաջին կիսամյակի համեմատ` պետբյուջեի եկամուտներն ավելացել են մոտ 22 տոկոսով, իսկ բյուջեի եկամուտների 93 տոկոսը ձեւավորվել է հարկային եկամուտների հաշվին:
Ծախսերը` ծրագրվածից քիչ, եկամուտները` սպասվածից շատ: Հայաստանի գլխավոր գանձապետն այսպես է գնահատում պետբյուջեի` այս տարվա առաջին կիսամյակի կատարողականը: Ըստ նրա` արդյունքները հուսադրող են, ինչը նշանակում է, որ նոր ծրագրերի համար էլ գումարներ կլինեն:
«Ակնկալվում է, որ տնտեսության առկա միտումների պահպանման դեպքում տարեկան ծրագրերը եւս կգերակատարվեն եկամտային մասում, ինչը հնարավորութուն կտա իրականացնել լրացուցիչ ծախսային ծրագրեր կամ ներկա ծրագրերն ընդլայնել»,- ասել է Ատոմ Ջանջուղազյանի:
Գլխավոր գանձապետն ասում է, որ ֆինանսների նախարարությունում լավատեսորեն են սպասել դրական փոփոխությունների, այդուհանդերձ, տարեսկզբին իրենք ավելի համեստ ու զգուշավոր սցենարով են աշխատել: Այսպիսով, այս տարվա հունվար- հունիսին եկամտի եւ դրամաշնորհների տեսքով բյուջե է մտել շուրջ 356 մլրդ դրամ: Սա սպասվածից 10.3 տոկոսով ավելի է: Բյուջեի եկամտի 93 տոկոսը հավաքված հարկերի ու տուրքերի հաշվին է:
«Հատկանշական է, որ հարկերի, տուրքերի ու սոցապվճարների գծով գերազանցումը 36.3 մլրդ դրամ է»:
Բյուջեով ծրագրված ծախսերն էլ խնայվել են 7.4 տոկոսով: Ծախսվել է շուրջ 342 մլրդ դրամ: Զերծ մնալով բազմաթիվ թվային մանրամասներից` նշենք, որ ծախսված գումարից շուրջ 15 մլրդ դրամ ուղղվել է պետական պարտքի տոկոսավճարներին, 120 մլրդ դրամի սոցիալանական նպաստ ու կենսաթոշակ է վճարվել, 28.5 մլրդ դրամի էլ` պետական աշխատավարձ: Եւս 67 մլրդ դրամ էլ վճարվել է պետական հիմնարկների համար ապրանքների կամ ծառայությունների ձեռք բերման համար:
«2010- ը մենք սկսել են գանձապետական միասնական հաշվում ընդամենը 161.8 մլրդ դրամ մնացորդով: Առաջին կիսամյակում գանձապետական միասնական հաշվում միջին մնացորդը կազմել է շուրջ 156 մլրդ դրամ»,- ասել է ՀՀ գլխավոր գանձապետը:
Որքանո՞վ են արդյունավետ կատարվել պետական ծախսերը: Ատոմ Ջանջուղազյանը նկատում է, որ պետական գանձապետարանը վերահսկողական գործառույթ չունի, միայն գնահատում է, թե որքանով են ներկայացված վճարային փաստաթղթերը համապատասխանում սահմանված պահանջներին: Իսկ մինչ վերահսկողական մարմինները կհրապարակեն իրենք գնահատման արդյունքները պետական ծախսերի արդյունավետության վերաբերյալ, ֆինանսների նախարարությունում փորձում են առավել ուշադիր լինել, որ պետական գումարները հօդս չցնդեն: Այս տարվանից արդեն հիմնականում պետական վարկերով իրականացվող տարբեր ծրագրերի իրականացման գրասենյակների կողմից ծախսերը պետք է ներառվեն պետբյուջեի մասին հաշվետվություններում: Հիշեցնենք, որ որոշ ժամանակ առաջի ֆինանսների նախարարը կառավարության նիստին հայտարարել էր, որ ոչ նորմալ վիճակ է ստեղծվել այս առումով:
«ԾԻԳ- երի հետ կապված կար խնդիր միջազգային կազմակերպությունների, մասնավորապես, Համաշխարհային բանկի հետ բոլոր համաձայնագրերով նախատեսված էր, որ ԾԻԳ- երի հաշիվները պետք է գտնվեն առեւտրային բանկերում: Երկարատեւ բանակցությունների արդյունքում, այդուհանդերձ, հաջողվեց հիմնավորել ու համոզել Համաշխարհային բանկին, որ այդ պահանջը կորցրել է իր արդյունավետությունը, եւ անհամեմատ ավելի նպատակահարմար կլինի այդ հաշիվների մնացորդն ունենալ գանձապետարանում: Դրանից բյուջեն երկկողմանի կարող է շահել»,- եզրափակել է Ատոմ Ջանջուղազյանը:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
