|
11.03.2010 14:31
 Հասմիկ Դիլանյան
«Ռադիոլուր»
Կառավարության հերթական նիստն ավարտվել է առանց ճեպազրույցի: Կառավարության անդամներն այսօր, ի տարբերություն մյուս օրերի, մերժել կամ էլ օրակարգից հանել են մի շարք նախագծեր: Նիստի սկզբում Տիգրան Սարգսյանն անդրադարձել է դեռ նախորդ տարի համաշխարհային ֆինանսատնտեսական ճգնաժամի պատճառով դադարեցված միջնաժամկետ ծախսային ծրագրերին:
Վարչապետը կառավարության բոլոր անդամներին հանձնարարեց «հսկողության տակ պետք է վերցնել միջնաժամկետ ծախսային ծրագրերը. այն պետք է համադրեք հանրապետության նախագահի նախընտրական ծրագրերի հետ, եւ քանի որ հիմա աշխատանքներ են ընթանում, որոնք մենք պետք է ավարտենք հունիսին, բոլոր նախարարները ինձ պետք է գրավոր զեկուցագիր ներկայացնեն, թե ինչպիսի խնդիրներ են նրանք տեսնում, որպեսզի մենք կարողանանք այն թիրախները, որոնք առկա են հանրապետության նախագահի նախընտրական ծրագրում, դարձնենք իրականանալի»:
Օրակարգն այսօր էլ ընդգրկուն էր, այն ներառում էր բազմաթիվ ու տարաբնույթ նախագծեր: 2011 թվականից արդեն հաշվապահական բոլոր հաշվետվությունները կհամապատասխանեն միջազգային չափանիշերին: Անվտանգ երթեւեկություն ապահովելու նպատակով էլ փոփոխություններ կատարվեցին համապատասխան օրենքներում:
«Տրանսպորտային միջոցի տեխնիկական զննությունն իրականացնել տեխնիկական զննության ցանկացած կայանում` անկախ տրանսպորտային միջոցի հաշվառման վայրից, գույաքահարկով հարկել ձյունագնացները եւ մոտոամենագնացները, հանել կորած վարորդական վկայականների, տրանսպորտային միջոցի հաշվառման վկայագրերի եւ հաշվառման համարանիշերի հետ գանձվող պետական տուրքի կրկնապատիկը»,- նախագիծը ներկայացրեց ոստիկանապետ Ալիկ Սարգսյանը :
էկոնոմիկայի նախարար Ներսես Երիցյանը վստահեցրեց, որ մեր երկիրն արդեն պատրաստ է մասնակցել «Շանհայ 2010» լայնամասշտաբ ցուցահանդեսին: Հայաստանն այս ցուցահանդեսին կներկայանա «Աշխարհի քաղաքը» խորագրով:
Կառավարությունն այսօր նաեւ հաստատեց սփյուռքի երիտասարդների` Հայաստան պարբերական այցելությունների «Արի տուն» 2010 թվականի ծրագիրն ու միջոցառումների ցանկը:
Վերահսկիչ պալատի նախագահ Իշխան Զաքարյանը տեղեկացրեց, որ էկոնոմիկայի նախարարությունում ստուգման ժամանակ իրենք առնչվել են բենզալցակայանների կառուցման ու շահագործման խնդիրների հետ: Սա, ի դեպ, այն ժամանակ, երբ տարածքային կառավարման նախարարի տեղակալ Վաչե Տերտերյանն առաջարկեց փոխել հողերի կատեգորիան եւ 1200 քառ. մետր տրամադրել մեկին, ով արդեն բավարար տարածք ունի գազալցակայան կառուցելու համար:
«Մարդը 4000 քառ. մետր հող ունի, ինչո՞ւ ենք նորից այդ 1200 մետրը տալիս: Չի բացառվում, որ գազալցակայանի կողքը կարող են օժանդակ կառույցներ լինել»,- ասաց Իշխան Զաքարյանը£
Վարչապետը համաձայնեց, որ հարցն օրակարգից հանեն՝ լրացուցիչ ուսումնասիրության համար:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
