|
10.03.2010 12:38
 Հասմիկ Դիլանյան
«Ռադիոլուր»
Ֆինանսների նախարարությունում այսօր վարկային նոր համաձայնագիր է կնքվել: Վերակառուցման ու զարգացման եվրոպական բանկի տրամադրած 15 մլն եվրոն ուղղվելու է Երեւանի Մետրոպոլիտենի սարքավորումների արդիականացմանը: Ակնկալվում է, որ ներդրումային այս ծրագրով ջրի դուրս մղման շնորհիվ մոտ 50 տոկոսով էլեկտրաէներգիայի ծախսը կկրճատվի:
Ֆինանսների նախարար Տիգրան Դավթյանն ու Երեւանի քաղաքապետ Գագիկ Բեգլարյանը խոստացել են, որ հատկացվող գումարը գտնվելու է խիստ հսկողության տակ:
Երեւանի քաղաքապետն ընդգծել է, որ Մետրոյի վերանորոգման ծրագիրը ամենակարեւոր ծրագրերից է, քանի որ լուծվելու է երեւանցիների ապահովության հարցը:
Խոսելով նոր կայարանների կառուցման հնարավորության մասին` Գագիկ Բեգլարյանն ասել է.«Սկզբում հնարավոր է, որ կենտրոնում` Աբովյան- Սայաթ-Նովա խաչմերուկում, մետրոյի նոր մուտք ունենանք, 2011- ին հնարավոր է շարունակենք Աջափնյակի նախկինում կիսակառույց թողած մետրոյի կառուցումը: Բայց դա վերջնական չէ: Վարկային ծրագրերից մեր կառավարությունը այսօր մի քիչ ավելի զգուշավոր է եւ բանակցություններն ընթանում են շատ հաջող, ինչպես կորոշի կառավարությունը, այդպես կշարունակվի»:
!
Լրատվությունը արտատպելու կամ օգտագործելու դեպքում հղումը Հայաստանի Հանրային Ռադիոյին պարտադիր է:
Տպելու տարբերակ
Վերադառնալ
|
